Расул Кушербаев: “Асака масъуллари ҳайф сизга…”
Ижтимоий тармоқларда фуқаро Отабек Нуритдиновнинг маъмурий қамоққа олинганлиги ҳақидаги хабарлар юзасидан ижтимоий тармоқларда фойдаланувчилар томонидан кескин фикрлар билдирилмоқда.
Ушбу ҳолат юзасидан Андижон вилоят ҳокимлиги Матбуот хизмати томонидан билдирилган расмий баёнот эса ҳеч қандай ижобий натижа бермади, аксинча, блоггерларнинг норозилигини янада кучайтирди.
Бу ҳақда Ўзбекистон Республикаси Олий Мажлиси Қонунчилик палатаси депутати Р.Х.Кушербаевнинг “Телеграмм” каналида билдирган фикрларини Сизнинг ҳукмингизга ҳавола қилмоқчимиз.
Отабек Нуриддиновнинг масъуллар ишини танқид қилгани учун Асакадаги бир гуруҳ мансабдорлар томонидан ўзаро тил бириктириб жазолатгани яна ҳам ойдинлашмоқда.
Шу ўринда Андижон вилояти ҳокимияти матуот хизмати томонидан ўта нохолис, ишончсиз ва бир ёқлама тайёрланган баёнотни кўриб чиқиб, уларга қуйидагиларни эслатмоқчиман.
Биринчидан, фуқаро-блогер ишлатган хароми, деган сўз ҳақоратга кирмайди. Бу Фарғона мисолида ўз исботини топган.
Иккинчидан, бир фуқаронинг ортидан пойлаб қадамба қадам юриб, материаллар тўплаш ИИБ ходими учун пасткаш иш. Мен билган «форма» кийганлар мард ва олийжаноб, энг муҳими ҳақиқий эркак кишилар. Халиям бу фикримда қоламан: уларга пасткашлик ярашмайди.
Учинчидан, фуқаро-блогер устидан арз қилганлар ушбу фуқаро томонидан танқидга учраган шахслар бўлгани боис, бу ишни кўриб чиқиб, қарор қабул қилинишида холислик бўлмаган, деб ўйлайман. Айланиб ҳам ўргилиб ҳам фуқаро масъулларнинг фаолиятини танқид қилгани учун жазолангани фактлигича қолаяпти. Бу фуқаролик жамиятини ривожлантириш йўлида жуда ёмон сигнал.
Тўртинчидан, қонунларни амалга тадбиқ қилишда тенгликка риоя қилинмай мансабдорлар учун ўта енгил ёндошув фуқаро учун ўта оғир ёндошув бўлмоқда. Ҳоким ҳақорат қилса исботланмайди ёки нари борса кечирим сўралади, фуқаро ҳақорат эмас танқид қилса ҳам қамалади.
Бешинчидан, энг ёмони уюштирилган шу ишни кўриб чиқиб, адолатли қарор қабул қилиш имкони бўлган суд ҳам адолатсизлик қилиб, Ўзбекистон номидан бир фуқарони фикр билдиргани, танқид қилгани ва ўзининг фуқаролик позициясини намоён қилгани учун жазолаган. Эссиз, зўравонлик асли биз суянган, ишонган, мустақил қиламиз ва тақдиримизни ишонамиз, деган доно суд орқали қилинмоқда. Хайф бўлсин.
Бундан чиқди вазиятдан келиб чиқиб, фуқаро сифатида конституциявий ҳуқуқимдан фойдаланиб билдирган танқидий фикрлар учун ҳам мени суд қарори билан жазо кутмоқдами?
Сўнггида айтар сўзим: Асака масъуллари ҳайф сизга, сиз адолатсиз, танқидни кўтара олмайдиган, давлат раҳбари намуна бўлиб олиб бораётган очиқлик йўлидаги ислоҳотларни тушунмайдиган, ўз ўрнига номуносиб шахслар экансиз. Яхшиси ўрнингиз халқпарвар, адолатли, давлат раҳбарининг сиёсатини тўғри англаб қўллаб қувватлайдиганларга бўшатиб беринг!
