Қадрли отахон ва онахонлар !
Азиз ёшлар !
Ҳурматли юртдошлар !
Сизларга яхши маълумки, бугунги кунда муҳтарам Президентимизнинг раҳбарлигида мамлакатимизда барча соҳаларда улкан ислоҳотлар амалга оширилмоқда.
Бу ислоҳотларнинг туб моҳияти, аввало, инсон қадрини улуғлаш, фуқароларнинг конституциявий ҳуқуқ ва эркинликларини рўёбга чиқариш, халқимизнинг тинчлиги ва осойишталигини таъминлаш, турмуш фаровонлигини оширишга қаратилганлиги билан ҳам аҳамиятлидир.
Албатта, ислоҳотларнинг натижадорлигини, одамларнинг тинч ва осуда ҳаёт кечиришини таъминлашдат ҳуқуқ-тартибот идораларининг зиммасида катта масъулият борлигини ҳам чуқур ҳис қиламиз.
Таъкидлаш керак, ўтган даврда барча давлат ва нодавлат идоралари ва халқимиз билан биргаликда барча соҳаларда қонунийликни таъминлаш, жиноятчилик ва коррупцияга қарши курашиш борасида муайян ишлар қилинди.
Энг муҳими, бугун тўла ишонч билан айтиш мумкинки, мамлакатда ҳуқуқ-тартиботни мустаҳкамлаш нафақат ҳуқуқни муҳофаза қилувчи органлар, балки бошқа идоралар ва кенг жамоатчиликнинг умуммиллий иши ва муҳим вазифасига айланди.
Ўз навбатида, олдимизда ҳал этилиши лозим бўлган масалалар ҳам кўп эканини барчамиз яхши тушунамиз.
Коррупцияга қарши курашиш Миллий кенгашининг кенгайтирилган мажлисида муҳтарам Президентимиз ҳам келгусидаги долзарб ва муҳим вазифаларни белгилаб бердилар.
Шу нуқтаи назардан, тегишли идоралар ва кенг жамоатчилик билан ҳамкорликда қуйидаги тадбирларни амалга оширишни белгилаб олдик.
Биринчидан, жиноятларнинг олдини олиш, мамлакатда криминоген вазият барқарорлигини таъминлаш бўйича кучайтирилган иш тартиби жорий этилди.
Энди барча куч ва воситаларни, жиноятларнинг оқибати билан курашишга эмас, уларни келтириб чиқараётган туб сабаб ва омилларни аниқлаб, бартараф этишга сафарбар қиламиз.
Бу борада ҳуқуқ-тартибот органлари ҳамда кенг жамоатчилик билан ҳамкорлик янада кучайтирилади, барча саъй-ҳаракатлар самарали мувофиқлаштириб борилади.
Ҳар бир маҳалла, хонадонгача тушиб, ҳуқуқбузарлик омилларини аниқлашга эътиборимизни кучайтирамиз, жиноят содир этган ва бунга мойиллиги бор фуқаролар билан бевосита учрашувлар ўтказиб, “фуқаробай” иш тизимини жорий қиламиз.
Ҳуқуқбузарлик ва жиноятга сабаб бўлаётган оилавий, ижтимоий, моддий ва психологик муаммоларни ҳал қилишга, ҳар бир фуқарода “жиноятчиликка қарши иммунитет”ни болаликдан шакллантиришга алоҳида эътибор қаратамиз.
“Жиноятга жазо муқаррар”лигини таъминлаш, жабрланганларнинг ҳуқуқ ва манфаатларини ишончли ҳимоя қилиш чоралари янада кучайтирилади.
Аҳамиятли жиҳати Давлатимиз раҳбарининг куни кеча қабул қилинган алоҳида қарорлари асосида содир этилган жиноятларни ҳар куни тезкор таҳлил қилиб, манзилли тадбирларни белгилаш, кунлик сўров ва назорат тизими йўлга қўйилади.
Иккинчидан, тергов сифати янада оширилади, бу жараёнларда инсон ҳуқуқ ва эркинликлари поймол этилишига йўл қўйилмайди.
Қайси идорада бўлмасин, ҳар бир текширув ҳамда тергов иши прокурорларнинг кундалик ва қатъий назоратида бўлади.
Текширув ва тергов ҳаракатларининг ҳар томонлама, тўлиқ, энг асосийси, холис ва қонуний ўтказилишини таъминлашга, тергов ходимларининг шахсий масъулиятини оширишга алоҳида эътибор қаратилади.
Бу фаолиятга илм-фан ютуқлари ва замонавий ахборот технологияларини кенг жорий этамиз, соҳани рақамлаштириш чораларини изчил кўриб борамиз.
Энг асосийси, одамларнинг тергов идораларида сарсон бўлишига, тазйиқ ва зўравонликка учрашига, ноқонуний ҳибсга олиниши ва жавобгарликка тортилишига йўл қўймасликнинг барча чораларини кўрамиз.
Айбланувчиларга эҳтиёт чорасини қўллашда адолатни таъминлаш, ҳимоя ҳуқуқини мустаҳкамлаш, адвокатлар фаолиятига тўсқинликларни бартараф этиш прокурорларнинг алоҳида эътиборида бўлади.
Учинчидан, бундан буён прокуратура органларининг энг юқори тизимидан қуйи бўғинигача, умуман, барча куч ва воситаларимиз коррупцияга қарши курашишга тўлиқ сафарбар қилинади.
Бу борада барча давлат ва нодавлат тузилмалари, ҳокимликлар, кенг жамоатчилик вакиллари билан ҳамкорликни янги босқичга олиб чиқамиз, жамиятнинг барча қатламлари салоҳиятини бирлаштириш йўлидан борамиз.
Жамиятда коррупцияга қарши муросасизлик муҳитини шакллантиришнинг барча чораларини кўрамиз.
Коррупцияга имкон бераётган омилларни, туб сабабларни аниқлаш учун энг чекка ҳудудларгача борамиз, ҳар бир соҳага чуқур кирамиз.
Ижтимоий сўровномалар, мулоқот ва учрашувлар ташкил қилиб, халқимизнинг эътирозлари, фикр ва таклифларини доимий ўрганамиз.
Шу орқали, соҳа ва ҳудудлардаги “коррупциявий туйнук”ларни аниқлаб, уларни таг-томири билан йўқ қилиш бўйича манзилли чоралар кўрамиз.
Бу борада тегишли вазирлик ва идоралар билан коррупциявий омилларни биргаликда бартараф қилиш бўйича йўл хариталари ва дастурлар ишлаб чиқилмоқда, уларнинг ижроси ҳам назоратга олинади.
Бюджет маблағлари, жумладан субсидия ва бошқа кўринишдаги давлат кўмагининг сарфланиши, давлат харидлари, хизмат кўрсатиш жараёнлари, умуман, аҳолимиз кўп дуч келадиган соҳаларда турли суиистеъмолчилик ва бюрократик тўсиқларнинг олдини олиш, қонунийликни таъминлаш диққат марказимизда бўлади.
Очиқлик ва шаффофликни таъминлаш, барча соҳаларни рақамлаштириш, инсон омилини қисқартириш чораларига алоҳида масъулият билан ёндашамиз.
Коррупцияни фош этишга доир ҳамкорликдаги тадбирларни ҳам янада жадаллаштирамиз, умуман, аҳоли ва тадбиркорларни, шу жумладан инвесторларни жиноий тажовузлардан ҳимоялаш учун бор имкониятлармизни ишга соламиз.
Бунинг учун, коррупциявий ҳолатлар ҳақида Бош прокуратурага тезкор хабар бериш имкониятини берувчи, туну — кун ишлайдиган “Ишонч телефони” ва телеграмм –ботни ишга туширдик. Махсус операторлар гуруҳи фаолиятини ҳам йўлга қўйдик.
Албатта, бу вазифаларни билимли, ташаббускор, садоқатли ва бугунги ислоҳотлар натижаларига дахлдорлик ҳисси билан яшайдиган ходимлар корпуси билангина самарали амалга ошириш мумкин.
Шу боис, ходимларимизнинг билими, дунёқараши, онгу тафаккурини ривожлантириш, маънавий салоҳиятини юксалтириш чораларини изчил давом эттирамиз.
Азиз юртдошлар !
Албатта, мамлакатимизда жиноятчилик ва коррурциянинг олдини олишда, умуман барча соҳаларда қонунийликни таъминлашда, биз – прокуратура ходимлари, энг аввало Сизнинг хайрихоҳлигингиз, ҳамжиҳатлигингиз ва кўмагингизга таянамиз.
Агарда ҳар бир фуқаро жонажон ватанимизни жиноятдан, коррупциядан холи, тинч ва хавфсиз ўлкага айлантиришга ўз ҳиссасини қўшса, барчамиз бир тану бир жон бўлиб, биргаликда курашсак кўзланган мақсадга албатта эришамиз.
Қонунларга қатъий риоя этиш, ўзгалар ҳуқуқи, шаъни ва қадр қимматини, мол — мулки дахлсизлигини ҳурмат қилиш, ҳам қонуний, ҳам инсоний бурчимиз эканини ҳамдоимо ёдда тутишимиз зарур.
Азиз юртдошлар, келинг, қонун устувор, адолат ҳукмрон бўлган жамиятни биргаликда барпо этайлик !
НИҒМАТИЛЛА ЙЎЛДОШЕВ,
Ўзбекистон Республикаси Бош прокурори
