Юнус Ражабий кўчасида дарахтлар кесилиши ҳолати давлат назоратига олинди
Тошкентнинг Яккасарой тумани Юнус Ражабий кўчасида 81 дона дарахтлар кесилгани хабар берилган эди.
Тошкент шаҳар ҳокимлиги матбуот хизматининг маълум қилишича, пойтахт ҳокимлиги ва прокуратураси ҳамда барча алоқадор ташкилот ва идоралар таркибида ишчи гуруҳ тузилган.
22 февраль куни эълон қилинган маълумотда ишчи гуруҳ қисқа муддатда шаҳримиз иқлими ва ландшафтига мос келадиган серсоя дарахтлар экиш орқали дарахтзорнинг қайта тикланишини таъминлаши кўрсатилган эди.
Бугун кўчат экиш ва бошқа ободонлаштириш ишлари бошлаб юборилгани хабар қилинди.
Қайта тикланган боғда ҳар бири 3,5 — 4 метрдан бўлган каштан, чинор, акация каби жами 150 та дарахтлар экилмоқда.
Дарахтлар кесилиши ҳолати бўйича қонунбузарликларга йўл қўйган шахсларга нисбатан эса қонуний чоралар кўрилади.
Тошкент шаҳар прокуратурасидан хабар беришларича, жиноят натижасида ўсимлик дунёсига етказилган 1 млрд. 891,3 млн. сўм миқдоридаги зарар айбланувчилардан ундирилган.
Тошкент шаҳар, Яккасарой тумани, “Юнус Ражабий” маҳалласида жойлашган 72, 66/1, 66/2 ва 66/4-уйлар оралиғидаги майдонда мавжуд кўп йиллик 81 та дарахтларнинг қонунга хилоф равишда кесилганлиги ҳолати бўйича тўпланган ҳужжатлар Тошкент шаҳар прокуратураси томонидан ўрганиб чиқилди.
Аниқланишича, Тошкент шаҳар ҳокимининг 2018 йил 18 апрелдаги 608-сонли қарорига асосан, “Building And Supplies” МЧЖга “Юнус Ражабий” маҳалласи 72, 66/1, 66/2 ва 66/4-уйлар оралиғида 0,5 гектар ер майдони кўп қаватли турар жой биноларини қуриш учун доимий фойдаланишга ажратиб берилган.
Ушбу қарор шаҳарсозлик қоидаларига зид бўлгани учун шаҳар прокурори томонидан 2018 йил 4 июлда протест келтирилган.
Шаҳар ҳокимининг 2018 йил 17 июлдаги 1053-сонли қарорига кўра, протест қаноатлантирилган ва 608-сонли қарор бекор қилинган.
Бу ҳолатдан норози бўлган “Building And Supplies” МЧЖ ҳудудий маъмурий судга ариза берган ва Бектемир тумани маъмурий судининг 2018 йил 12 ноябрдаги қарори билан шаҳар ҳокимининг 1053-сонли қарори ҳақиқий эмас деб топилган.
“Юнус Ражабий” маҳалласида яшовчи аҳолининг шаҳар ҳокимининг 608-сонли қарорини ҳақиқий эмас деб топиш тўғрисидаги Чилонзор тумани маъмурий судига киритган аризаси, суд томонидан 2019 йил 11 декабрда рад қилинган. Ушбу суд қарори 2020 йил 27 январда Тошкент шаҳар маъмурий суди апелляция инстанциясида кўрилган ва ўзгаришсиз қолдирилган.
“Building And Supplies” МЧЖ томонидан унга ажратилган ер майдонидаги кўп йиллик 81 та дарахтлар қонунга зид равишда кесилганлиги оқибатида ўсимлик дунёсига 630,4 млн. сўм моддий зарар етказилган.
Мазкур ҳолат юзасидан Тошкент шаҳар прокуратураси томонидан 2020 йил 22 февралда Жиноят кодексининг 205-моддаси 2-қисми “а” банди ва 198-моддаси 2-қисми билан Яккасарой тумани ҳокимлиги ва “Building And Supplies” МЧЖ мансабдор шахсларига нисбатан жиноят иши қўзғатилган.
Жиноят кодексининг 198-моддаси 4-қисмига кўра, етказилган моддий зарар уч карра миқдорида қопланган тақдирда, озодликни чеклаш ва озодликдан маҳрум қилиш тариқасидаги жазо қўлланилмайди.
Дастлабки терговда 2 нафар айбланувчилардан 1 млрд. 891,3 млн. сўм моддий зарар ундирилди ва уларга гаров эҳтиёт чораси қўлланилди.
Жиноят иши бўйича дастлабки тергов ҳаракатлари шаҳар прокуратураси томонидан олиб борилмоқда.
