Коррупция давлат ва жамият тараққиётига тўсқинлик қилувчи, қонун устуворлиги ҳамда фуқароларнинг давлат органларига бўлган ишончига салбий таъсир кўрсатувчи ҳуқуқий муаммолардан биридир.
Ўзбекистон Республикаси Президентининг 2021 йил 6 июлдаги ПФ-6257-сон Фармони билан коррупцияга нисбатан муросасиз муносабатни шакллантириш, давлат ва жамият бошқарувида коррупциявий омилларни камайтириш ҳамда жамоатчилик иштирокини кенгайтиришнинг устувор йўналишлари белгиланган. Шунингдек, 2023 йил 27 ноябрдаги ПФ-200-сон Фармон коррупцияга қарши курашиш тизимини такомиллаштириш ва жамоатчилик назорати самарадорлигини оширишга қаратилган.
Коррупцияга қарши курашишнинг асосий шартлари — қонунийликни таъминлаш, манфаатлар тўқнашувининг олдини олиш, давлат органлари фаолиятининг очиқлиги ва мансабдор шахсларнинг масъулиятини оширишдан иборат.
Суд-ҳуқуқ тизимида қонун нормаларига қатъий риоя этиш, ишларни холис ва адолатли кўриб чиқиш, ҳар бир ҳолатга қонуний баҳо бериш коррупциянинг олдини олишда муҳим аҳамият касб этади.
Хулоса қилиб айтганда, коррупцияга қарши курашиш фақат ваколатли органларнинг эмас, балки ҳар бир фуқаронинг ҳам вазифасидир. Қонунга ҳурмат, ҳалоллик ва коррупциявий ҳолатларга нисбатан муросасиз муносабатни шакллантириш орқали қонунийлик, адолат ва жамоатчилик ишончини мустаҳкамлаш мумкин.
Коррупцияга муросасиз муносабат — қонун устуворлиги ва адолатли жамиятнинг муҳим шартидир.
О.Эргашев,
Сурхондарё вилоят судининг судьяси
