Сурхондарё худудларида зарарли чигирткаларга қарши ўтказилган кимёвий ишловлар давом этмоқда
Сурхондарё вилояти яйлов ҳудудларида 2026 йил баҳор-ёз мавсумида зарарли чигирткаларнинг тарқалиши ҳамда уларга қарши олиб борилаётган кураш тадбирлари бўйича 23 апрель ҳолатига шаклланган тезкор маълумотлар таҳлили ҳудудда фитосанитар вазият жиддий назорат остида эканлигини кўрсатади. Мониторинг ишлари тизимли равишда ташкил этилиб, мутахассислар томонидан жами 52 490 гектар яйлов майдонлари тўлиқ ўрганиб чиқилган. Ўрганишлар натижасида 32 406 гектар майдонда зарарли чигирткалар мавжудлиги аниқланиб, бу умумий кузатилган майдоннинг сезиларли қисмини ташкил этади. Зараркунандалар зичлиги ҳудудлар кесимида фарқланиб, асосан 1 м² да 100 донадан 250 донагача бўлган кўрсаткичлар қайд этилган. Айрим ўчоқларда зарарланиш даражаси юқори бўлиб, бу эса тезкор чоралар кўришни тақозо этган.
Мазкур ҳолатдан келиб чиқиб, зарарланган ҳудудларда кимёвий ишлов бериш ишлари кечиктирилмасдан ташкил этилди. Ҳисобот даврида жами 29 195 гектар майдонда ҳимоя тадбирлари ўтказилиб, кунлик ўртача ишлов бериш ҳажми 1 564 гектарга етказилган. Бу кўрсаткичлар ҳудудларда ишлар юқори суръатларда олиб борилаётганини ва зараркунандалар тарқалишини чеклашга қаратилган чоралар самарали ташкил этилганини кўрсатади.
Кимёвий ишлов бериш жараёнида турли русумдаги замонавий техника ва мосламалардан кенг фойдаланилди. Жумладан, моторли қўл пуркагичлари ёрдамида 3 791 гектар, ОВХ-600 русумли пуркагичлар билан 1 711 гектар, ВП-600 техникалари ёрдамида 9 786 гектар ҳамда УЛВ-1200 юқори самарадорликка эга агрегатлар орқали 13 907 гектар майдонларга ишлов берилган. Айниқса, УЛВ-1200 техникаларининг кенг қўлланилиши катта майдонларни қисқа муддатда қамраб олиш имконини бериб, умумий самарадорликни оширган.
Ушбу жараёнларга жами 65 та моторли қўл пуркагич, 5 та ОВХ-600, 19 та ВП-600 ва 11 та УЛВ-1200 техникалари жалб этилган. Бундан ташқари, ишлов бериш жараёнини узлуксиз ташкил этиш мақсадида 10 та сув ташувчи махсус транспорт воситалари сафарбар қилинган ҳамда жами 121 нафар ишчи-ходим бевосита дала шароитида фаолият олиб борган. Бу эса ишларнинг комплекс ва мувофиқлаштирилган ҳолда олиб борилаётганидан далолат беради. Ҳудудлар кесимида олиб борилган таҳлиллар шуни кўрсатадики, айрим хўжаликларда зарарланиш даражаси юқорироқ бўлишига қарамай, ўз вақтида амалга оширилган кимёвий ишловлар натижасида зараркунандаларнинг оммавий кўпайиб кетишининг олди олинмоқда. Айниқса, юқори зичлик кузатилган ўчоқларда қўшимча ишловлар ташкил этилиши орқали вазият барқарорлаштирилмоқда.
Умуман олганда, вилоятда зарарли чигирткаларга қарши курашиш бўйича олиб борилаётган тадбирлар изчил ва самарали йўлга қўйилган. Мониторинг ишлари доимий равишда давом эттирилмоқда, аниқланган янги ўчоқлар зудлик билан бартараф этилмоқда ҳамда зарурат туғилганда қўшимча техника ва ишчи кучларини жалб этиш режалаштирилган. Шу орқали яйловлар ва қишлоқ хўжалиги экинларини зараркунандалардан ҳимоя қилиш, уларнинг салбий таъсирини камайтириш ҳамда ҳосилдорликни сақлаб қолиш бўйича аниқ ва манзилли чоралар кўрилмоқда.
Даврон Тангиров
вилоят чигиртка ва тут парвонасига қарши кураш хизмати бошлиғи
