(суд очерки)
Маълумки, фирибгарлик, яъни алдаш ёки ишончни суиистеъмол қилиш йўли билан ўзганинг мулкини ёки ўзганинг мулкига бўлган ҳуқуқни қўлга киритиш жиноят ҳисобланади.
Масалан, фуқаро Х.А фирибгарлик, яъни ўзганинг мулкини алдаш ва ишончни суиистеъмол қилиш йўли билан қўлга киритиш мақсадида, ўзининг олдиндан тузган жиноий режасига асосан 2024 йил
3 май куни Жарқўрғон туманида яшовчи фуқаро А.Н ўзига тегишли бўлган “пресс подборщик” ускунасини сотувга қўйганлигидан хабар топиб, дастлаб у билан “пресс подборщик” ускунаси сотиб олишини айтиб телефонда гаплашиб, шу куннинг ўзида А.Ннинг яшаш уйига бориб, унга “пресс подборщик” ускунаси 55.000.000 сўмга сотиб олишини, пулини 2024 йил
15 май куни олиб келиб беришини ваъда қилиб, уни алдаб ишончига кириб, “пресс подборщик” ускунасини ўзи билан Сариосиё туманига олиб кетиб, кейинчалик ушбу “пресс подборщик”ни бошқа шахсга сотиб юбориб, ваъда қилган вақтида пулларини олиб келиб бермасдан, унинг ишончини суиистеъмол қилиб, фирибгарлик йўли билан қўлга киритган пулларни ўзининг эҳтиёжлари учун ишлатиб юбориб, натижада фуқаровий даъвогар А.Нга 55.000.000 сўм моддий зарар етказган.
Бундан ташқари, Х.А 2024 йил 7 май куни фирибгарлик йўли билан қўлга киритган, аслида А.Нга тегишли бўлган “пресс подборщик” ускунасини Сариосиё туманида яшовчи фуқаро Х.Кга ўзига тегишли эканлигини айтиб, уни алдаб, ушбу “пресс подборщик” ускунасини
2.000 АҚШ долларига сотиб юбориб, келишилган пулни нақд олиб, унинг ишончини суиистеъмол қилиб, фирибгарлик йўли билан қўлга киритган пулларни ўзининг эҳтиёжлари учун ишлатиб юбориб, натижада фуқаровий даъвогар К.Хга 2.000 АҚШ доллари қийматда 25.296.240 сўм моддий зарар етказган.
Суд ҳукми билан Х.Ага Ўзбекистон Республикаси ЖКнинг 168-моддаси 3-қисми “б” банди билан ЖКнинг 57-моддасини қўллаб, 5 йил муддатга озодликдан маҳрум қилиш жазоси тайинланиб, ЖКнинг 60-моддаси тартибида узил-кесил 5 йил 6 ой муддатга озодликдан маҳрум қилиш жазоси тайинланган.
Апелляция инстанциясининг ажрими билан суд ҳукми ўзгаришсиз қолдирилган.
Хулоса шуки, қонунларга риоя қилмаслик албатта жавобгарликка сабаб бўлади.
Сурхондарё вилоят суди жиноят ишлари бўйича судьяси
М.Маликов
